Shugabar Kotun Daukaka Kara, Mai Shari’a Monica Dongban-Mensem, ta bayar da umarnin mayar da kotun sauraron kararrakin zaben Gwamnan Kogi daga Lokoja zuwa Abuja.
A cewar wata sanarwa da David Umar Mike, sakataren kotun ya fitar, yanzu haka za a gudanar da dukkan shari’ar a cibiyar shari’a ta kasa da ke kan titin Umar ‘Yar’adua a birnin tarayya Abuja.
An bukaci masu kara da su lura da sauyin da aka samu.
Yayin da sanarwar ba ta fayyace dalilin daukar matakin ba, wata majiya mai tushe a cikin kotun ta bayyana cewa an dauki matakin ne saboda fargabar matsalolin tsaro.
Majiyar ta bayyana cewa an sha kai hare-hare da dama ga ma’aikatan kotun a Lokoja, al’amarin da ya kai matsayin da rayuwarsu ke cikin hadari.