Gwamnatin Tarayya ta ce za a fara aikin kidayar jama’a da gidaje na 2023 a ranar 3 ga watan Mayu dake tafe.
Wani mamba a kwamitin yada labarai da bayar da shawarwari kan kidayar yawan jama'a da gidaje na kasa na shekarar 2023, Dr Garba Abari, ya tabbatar da haka ranar Lahadi a Abuja.
Ya ce aikin na kwanaki uku zai fara ne daga ranar 3 ga watan Mayu sannan kuma za a kare a ranar 5 ga watan Mayu a fadin kasarnan.
Abari, wanda shi ne Darakta-Janar na Hukumar Wayar da Kan Jama’a ta Kasa NOA, ya bayyana cewa, aikin kidayar zai kirga kowanne mutum da gida a lungu da sako.