Andy Burnham zai karbi ragamar mulki a matsayin sabon Firaministan Birtaniya a yau Litinin.
Burnham zai zama mutum na shida da zai jagoranci gwamnatin kasar tun daga shekarar 2016, a daidai lokacin da kasar ke fuskantar kalubale da dama na tattalin arziki da siyasa.
Burnham mai shekaru 56 zai gaji Keir Starmer, wanda ya yi murabus daga mukamin Firaminista shekaru biyu kacal bayan ya jagoranci Jam'iyyar Labour zuwa gagarumar nasara a zaben da ya kawo karshen mulkin shekaru 14 na Jam'iyyar Conservative.
Bayan da Sarkin Birtaniya, Charles na Uku, ya bukace shi da ya kafa sabuwar gwamnati, ana sa ran Burnham zai gabatar da jawabinsa na farko a gaban ofishin Firaminista da ke lamba 10 Downing Street, bayan Keir Starmer ya yi ban kwana da mukamin.
A wata hira da ya yi da jaridar The Times, Burnham ya bayyana cewa babban burinsa shi ne kawo sauyi da kuma kawo karshen shekaru na rikice-rikicen siyasa da suka addabi Birtaniya. Ya ce, "Abin da muka kasance muna yi bai samar da sakamakon da ake bukata ba. Ina son gwada wata sabuwar hanya ta shugabanci."
Tawagar Burnham ta ce a jawabinsa na farko zai jaddada bukatar dawo da amincewar jama'a ga gwamnati, rage radadin tsadar rayuwa da kuma bunkasa tattalin arziki. Ana kuma sa ran zai sanar da sabbin ministocinsa, yayin da ake sa ido kan wanda zai maye gurbin Rachel Reeves a matsayin Ministan Kudi.
Kafin wannan nadin, Burnham ya kasance Magajin Garin Greater Manchester, kuma ana masa lakabi da "Sarkin Arewa" saboda tasirinsa a siyasar arewacin Ingila.
Jam'iyyar Labour ta zabe shi ne bayan murabus din Starmer, inda 'yan majalisa suka yi imanin cewa shi ne zai fi dacewa wajen karfafa jam'iyyar gabanin zabuka masu zuwa da kuma tinkarar kalubalen da jam'iyyar Reform UK ke haifarwa.
Comments
Add a comment