‘Yan takarar shugaban kasa a zaben da ya gabata, Atiku Abubakar na jam’iyyar PDP da kuma Peter Obi na jam’iyyar Labour, Sunyi fatali da hukuncin da kotun sauraren kararrakin zaben shugaban kasa ta yanke, na sake tabbatar da nasarar da Bola Tinubu ya samu a zaben da ya wuce.
A hirarsa da manema Labarai a daren jiya, jim kadan bayan kammala zaman kotun, Lauyan Atiku, Chiris Uche, Ya ce ya samu umarni daga wajen wanda yake karewa, kan cewar zasu daukaka kara zuwa kotun koli.
Haka zalika shima mashawarcin jam’iyyar Labour ta bangaren shari’a, Kehinde Edun, Ya kudiri aniyar kalubalantar sakamakon zaben a gaban kotun koli.
Mister Edun ya baiyana bacin ransa da yadda hukuncin kotun ya kasance, Inda ya baiyana cewar Kotun bata yi masu adalci ba, ta yadda ta yi watsi da shaidu guda 10 daga cikin 13 da suka gabatar mata, wanda hakan ya yi babban lahani ga karar da suka shigar gaban kotun.