Gwamna Ahmed Aliyu na jihar Sokoto a ranar Alhamis ya fara kulle kofar gidan gwamnati ga ma’aikatan da ke zuwa aiki a makare.
An ce gwamnan ya tuka kansa a mota zuwa gidan gwamnati da karfe 8:30 na safe sai dai ya gano cewa yawancin ma’aikatan ba sa ofisoshi daban-daban.
Sai dai ya gamu da masu shara da goge-goge da ma’aikacin jinya daya a asibitin gidan gwamnati, amma ya umarci jami’an tsaro da su kulle kofar kuma kada su bari kowa ya shiga.
Bayanai sunce kofar ta kasance a rufe har zuwa karfe 1 na rana, yayin da manyan ma’aikata da dama ciki har da wasu daga cikin hadiman gwamnan suka gaza samun damar shiga.