Gwamnan jihar Kano Abba Kabir Yusuf Ya ce har kawo wannan lokaci babu wani mataki da gwamnatinsa take shirin dauka akan sabbin masarautun jihar Kano,kamar yadda labarai ke karade shafukan sada zumunta, dake baiyana cewar gwamnati na shirin yiwa dokar masarautun gyaran fuska.
Jita jitar ta nuna cewar Gwamnan Kano na shirin aikewa da wani kudirin doka gaban zauren majalisar dokokin jihar kano, domin yiwa dokar masarautun kano kwaskwarima, wanda hakan zai bada damar rushe masarautar Bichi da Gaya da Rano da kuma masarautar Karaye.
Sai dai wata sanarwa da Kakakin gwamnan, Sanusi Bature ya fitar a daren jiya, Babu wani labari mai kama da wannan, Kazalika ta baiyana cewar dukkanin wasu abubuwa da zasu gudana tsakanin bangaren zartawa da majalisa, za’a yi su ne a bude domin kowa ya sani.
Bugu da kari sanarwar ta tabbatar da cewar, gwamnan na Kano zai tura da sunayen mutanen da ake son nadawa kan matsayin kwamishinoni gaban zauren majalisar dokokin jihar Kano, a makon gobe domin tantancewa.