Rundunar sojin saman Najeriya ta yi watsi da rahotannin da ke yawo a kafafen sada zumunta na zamani na cewa jiragenta sun kai wani hari ta sama wanda ya kai ga kashe fararen hula bisa kuskure a jihar Kaduna.
Kakakin Rundunar Sojojin Sama, Air Commodore Edward Gabkwet a wata sanarwa ranar Litinin, ya ce rundunar ba ta gudanar da wani aiki a Kaduna ko kewaye cikin sa’o’i 24 da suka gabata ba.
A cewarsa, ba rundunar ce kadai ke gudanar da jiragen yaki marasa matuka ba a yankin Arewa maso yammacin Najeriya.
Ya kuma yi kira da a yi taka-tsan-tsan kafin a wallafa rahotannin da ba a tabbatar da su ba a kafafen yada labarai.