Mataimakin shugaban majalisar dattawa, Sanata Barau Jibrin, na yin wani yunkuri na dakatar da matakin Kantin Shoprite, na rufe reshensa daya tilo a jihar Kano.
Idan za’a iya tunawa Shoprite a makon da ya gabata ya sanar da matakinsa na ficewa daga Kano a watan Janairun 2024 bayan shafe shekaru 9 tun daga 2014, yana mai dora alhakin hakan a kan kalubalen tattalin arziki.
Wata sanarwa da mai baiwa Sanata Barau shawara kan harkokin yada labarai da wayar da kan jama’a Ismail Mudashir ya fitar a yammacin ranar Litinin, ta ce mataimakin shugaban majalisar dattawan zai gana da mahukuntan kamfanin a cikin makon nan a Abuja kan al’amarin.