Gabanin yanke hukuncin da kotun sauraren kararrakin zaben shugaban kasa dake zamanta a Abuja, zata yi a gobe Laraba, Dakarun sojin kasar da kuma jami’an ‘yansanda sun baiyana cewar ba zasu saurarawa duk wani mutum dake shirin tada zauni tsaye, ta hanyar daukar doka a hannunsa.
Daraktan yada labaran rundunar sojin kasa, Birgediya janar Tukur Gusau, Ya gargadi masu shirin tada zauni tsaye a gobe, da su yi gaggawar janye aniyar tasu.
Ya ce dakarunsu tare da hadin gwiwar jami’an tsaro ba zasu saurarawa duk wanda aka samu da yunkurin haifar da wata fitana ba.
Haka suma Hukumomin ‘yansanda sun sake tsaurara matakan tsaro a jihohinsu gabanin yanke hukuncin da kotun zata yi a ranar Larabar nan.