Gwamnan jihar Kano Abba Kabir Yusuf ya yi kira ga hukumar hana sha da fataucin miyagun kwayoyi ta kasa, data magance matsalolin cikin gida take kawo mata tarnaki wajen yaki da ta’ammali da miyagun kwayoyi.
Gwamnan ya yi wannan roko ne ta bakin shugaban Ma’aikatansa, Shehu Sagagi a yayin kona Tan 15 da digo 7 na miyagun kwayoyi da hukumar ta NDLEA ta yi.
Ya ce samun wasu mutane a cikin hukumar da ke yiwa hukumar zagon kasa ta hanyar hada baki da masu dillancin miyagun kwayoyi, na komar da kokarin gwamnati baya na yaki da matsalar.
Haka zalika gwamnan ya jaddada kudirin jihar nan na yaki da matsalar shaye-shaye ta hanyar samar da cibiyoyin koyar da sana’oi domin sauya matasa daga kan wannan halaiyya.